Регионални центри за услуги: Повеќе време, помалку бирократија
На денешната собраниска седница за пратенички прашања, пратеничката од ВМРО-ДПМНЕ, Даниела Христова, упати прашања до министерот за дигитална трансформација, Стефан Андоновски, за регионалните центри за услуги. Таа посочи дека овие центри нудат брзи, ефикасни и транспарентни административни услуги, но дека јавноста сè уште не е доволно запознаена со нивната работа.
„Министерството за дигитална трансформација е релативно ново, но за периодот откако е формирано постигна високи резултати и воспостави стандарди кои навистина недостигаа во Македонија. Брзата реализација на стратешките активности, подобрување на ефикасноста и транспарентноста во работењето, се доказ дека вистински реформи се можни кога се има визија и одговорност кон граѓаните, а оваа Влада го поседува токму тоа. Министерството за дигитална трансформација постои краток период, но постигна многу. Воведе нови дигитални услуги достапни за сите граѓани, ги скрати административните процедури и времето на чекање, работи на зајакнување на сајбер безбедноста и заштита на податоците, а исто така воспостави механизми на координација меѓу институциите итн. Она што мене ме интересира а и многу голем број на граѓани се новоотворените центри за услуги во неколку градови во државата, за коишто јас лично сметам дека се одлична новина, но и дека е потребна поголема промоција, за што голем број граѓани не се запознаени и се уште не знаат дека со посетата на еден ваков центар ќе добијат брзи, ефикасни и транспарентни административни услуги, сето тоа на едно место. За нив тоа значи повеќе време, помалку бирократија, а повеќе функционалност и доверба. Дали планирате вакви центри за услуги во сите градови во Република Македонија и дали може да не запознаете конкретно какви услуги нудат овие центри?“, праша Христова.
Финансиска состојба: Консолидирана државна каса и економски раст
Во второто прашање, Христова се осврна на наследената финансиска состојба од претходната власт и праша до министерката за финансии, Гордана Димитриеска Кочоска, за очекувањата на финансиски план во 2026 година.
„Како пратеници кога го започнавме нашиот мандат, од првите моменти, беше соочувањето со финансиската состојба во нашата држава, односно каква државна каса наследивме од претходната ненародна влада, која имаше многу други приоритети, само не интересите на граѓаните. Со доаѓањето на ВМРО-ДПМНЕ на власт наследивме испразнет буџет, уште во месец јули, а пари во истиот требаше да има до месец декември. Со голема посветеност и труд успеавме да се консолидираме и да бележиме неколку квартали раст на БДП, дури и над 3%, т.е. дури подобро и од проекциите на меѓународните институции. А тоа е јасен сигнал дека владините политики функционираат и даваат резултати. Со консолидиран буџет, со фокус на раст и инвестиции, успеавте да ја стабилизирате економијата. Моето прашање е што може да очекуваме на финансиски план во тековната 2026 година?“, рече Христова.
Ефектите од регионалните центри и буџетската стабилност
Христова нагласи дека регионалните центри за услуги се важен чекор кон ефикасно и транспарентно управување со административните процеси. Таа посочи дека обезбедувањето на информации за граѓаните и промоцијата на овие центри ќе ја зголеми довербата во институциите.
Истовремено, консолидацијата на државниот буџет и забележаниот економски раст се клучни за планирањето на финансиите во тековната година и за поддршка на инвестициски проекти и јавни услуги.