Бунтовниците Хути испалија втора серија ракети кон Израел во рок од 24 часа, додека конфликтот на Блискиот Исток дополнително се шири и вклучува нови актери.
Израелската војска соопшти дека една ракета била лансирана од Јемен, но била пресретната пред да стигне до територија во близина на јужниот град Еилат.
Во исто време, Израел ги засили нападите врз цели во Иран, вклучително и поморски истражувачки центар, како и локации во Техеран доцна на 28 март.
Техеран, пак, соопшти дека бродовите од „пријателските“ земји ќе можат да поминуваат низ Ормутскиот теснец, во услови на зголемени тензии околу клучните поморски рути.
Повеќе од 3.500 американски војници се распоредени на Блискиот Исток, меѓу кои и околу 2.500 маринци, соопшти американската Централна команда, во рамки на засилените подготовки на Вашингтон.
Според „Вашингтон пост“, кој се повикува на неименувани американски претставници, Пентагон подготвува планови за копнени операции во Иран кои би можеле да траат со недели. Белата куќа не го негираше извештајот, но посочи дека станува збор за рутинско планирање за непредвидени ситуации.
Хутите, кои имаат поддршка од Иран, досега избегнуваа директно вклучување во конфликтот, но најновите напади отворија стравувања за можна ескалација и загрозување на пловидбата низ теснецот Баб ал-Мандаб, преку кој минува околу 10 проценти од светската трговија со нафта.
Нивното вклучување се оценува како дополнителен ризик за проширување на конфликтот, кој веќе има пошироки регионални импликации, вклучувајќи напади во Персискиот Залив и потенцијални закани кон други стратешки локации.