Илјадници турски здравствени работници, лути поради обезвреднување на приходите поради високата инфлација, денеска стапија во еднодневен штрајк со барање за подобри плати и услови за работа.
Членови на здруженија на лекари и синдикати организираа протести во Анкара и Истанбул, барајќи повисоки плати, кои за некои се малку над минималната плата.
Демонстрантите бараат и пократки смени, воведување мерки за заштита од зголемениот број вербални и физички напади од страна на пациенти или нивни роднини, како и означување на заразата со коронавирус за опасност на работа.
Демонстрантите велат дека сакаат „плата од која можат да живеат како луѓе“, бидејќи „сега не можат да врзат крај со крај“.
Инфлацијата во Турција во јануари достигна речиси 49 отсто, што е највисоко ниво во последните 20 години, со што значително се намали куповната моќ на граѓаните, како и вредноста на нивните заштеди.
Опозицијата тврди дека околу 3.000 лекари ја напуштиле Турција во последните две години и предупредува дека земјата може да се соочи со сериозен одлив на мозоци доколку условите не се подобрат.