Иран одобри транзит на бродови од неколку земји низ Ормуз
Иран одобри премин на бродови од неколку земји низ Ормускиот теснец, потврди портпаролот на иранското Министерство за надворешни работи, Есмаил Багаеи. Податоците за сообраќајот покажуваат дека ирански, индиски, кинески и грчки бродови го напуштиле Персискиот Залив.
„Земјите, во координација со Исламската Република Иран, ги спроведоа своите бродови со поддршка на пилоти низ Ормускиот теснец. Самото ова го покажува одговорниот пристап на Исламската Република Иран“, изјави Багаеи во емисија на телевизијата SNN, без дополнителни детали.
Контрола по нападите и ограничен транзит
Техеран ја презеде контролата врз Ормускиот теснец по нападот на САД и Израел на 28 февруари, при што беше забранет транзитот за бродови поврзани со САД, Израел, европските земји и нивните партнери.
Транзитот на нафта низ теснецот е намален од предвоените 20 милиони барели дневно на помалку од два милиони барели дневно, предупреди минатата недела Меѓународната агенција за енергија (IEA).
„Ситуацијата на која сме сведоци во изминатите неколку дена е последица на војната што САД и Израел му ја наметнаа на регионот“, изјави Багаеи, додавајќи дека Иран „има право да преземе неопходни мерки за заштита на националната безбедност“.
Индиски танкери под надзор и дипломатски напори
Пакистанскиот танкер „Афрамакс Карачи“, натоварен со нафта од Обединетите Арапски Емирати, безбедно помина низ теснецот по одобрена рута од иранските власти.
Иран дозволи премин и на два индиски танкери во сопственост на Индиската бродска корпорација, кои транспортираа течен нафтен гас под надзор на индиската морнарица.
Индискиот министер за надворешни работи Субраманјам Џајшанкар изјави дека безбедното преминување е резултат на дипломатски напори, додавајќи дека одлуките за движење на бродовите се носат од случај до случај.
Во меѓувреме, индискиот танкер „Шивалик“ пристигна во пристаништето Мундра, додека „Нанда Деви“ се очекува да пристигне во вторник. Танкерот „Џаг Лаадги“ моментално се наоѓа во близина на западниот брег на Индија.
Ограничен сообраќај и „флота во сенка“
Според податоците на компанијата „Лојдс Лист Интелиџенс“, само 77 бродови поминале низ Ормускиот теснец во периодот од 1 до 11 март, наспроти 1.229 бродови во истиот период минатата година.
Од тие бродови, 26 проценти биле насочени кон Иран, додека грчките и кинеските бродови учествуваат со 13 и 12 проценти.
„Повеќе од половина од танкерите за нафта и гас што минуваат низ теснецот се дел од таканаречената „флота во сенка““, изјави аналитичарката Бриџит Диакун.
Терминот „флота во сенка“ се однесува на танкери кои не се осигурени од западните осигурители и ги избегнуваат западните санкции.
САД без забелешки за дел од транзитот
САД немаат забелешки за тоа одредени ирански, индиски и кинески бродови да минуваат низ Ормускиот теснец, изјави американскиот министер за финансии Скот Бесент.
Тој посочи дека сè повеќе танкери повторно го користат теснецот, додавајќи дека „Ирански бродови поминале и претходно, а ние им дозволивме за да може остатокот од светот да биде снабден“.