ИСТОРИСКИ УСПЕХ ВО КОШАРКАРСКАТА ЛИГА: Никола Јокиќ стигна до својот 200. трипл-дабл во НБА

Никола Јокиќ стана само вториот кошаркар во целокупната историја на НБА-лигата што успеал да забележи 200 трипл-дабл остварувања во регуларниот дел од сезоната. Српскиот центар ја достигна оваа ретка статистичка бројка во победата на Денвер нагетс над Њу Орлеанс со резултат 104:91.

Пред него ваков потфат му успеал единствено на Расел Вестбрук, кој ја заврши својата кариера со рекордни 209 трипл-дабл остварувања. Јокиќ го заврши натпреварот со учинок од 21 поен, 13 скока и 10 асистенции, со што стигна до својот втор трипл-дабл во новата сезона, а јубилејниот 200. го забележа во својата 12. сезона во НБА-лигата.

Вестбрук, кој летово замина во кошаркарска пензија, до својот рекорд стигна во текот на 18 одиграни сезони, а интересно е што и тој својот 200. трипл-дабл го забележа токму додека го носеше дресот на Денвер. На српскиот центар сега му се потребни уште само 9 вакви остварувања за да го израмни рекордот, додека со 10 ќе стане осамен рекордер во историјата на најсилната лига во светот.

Екипата на Денвер имаше целосна контрола врз играта против Њу Орлеанс и уште во првото полувреме стекна убедлива предност од 22 поена. Домашниот тим успеа да ја намали разликата на само 5 поени во последната четвртина, но гостите не дозволија целосен пресврт и ја сочуваа победата. Џамал Мареј постигна 23 поени за победничкиот состав, Арон Гордон запиша 15 поени и 11 скока, додека кај Њу Орлеанс најефикасен поединец беше Зајон Вилијамсон со 25 постигнати поени.

Двата тима веќе еднаш ги одмерија силите во новата сезона на 24 октомври, кога Денвер победи по продолжение со 141:135, откако претходно надомести заостанување од 23 поени. На тој натпревар Јокиќ оствари 35 поени, 15 скока и 10 асистенции, што беше негов 199. трипл-дабл, додека Мареј уфрли 42 поена. Меѓу тие два дуели со Њу Орлеанс, составот на Денвер претрпе пораз од Голден Стејт со 134:114, отворајќи ја натпреварувачката сезона со биланс од две победи и два пораза.

Изминатата сезона Јокиќ ја заврши со дури 34 трипл-дабл остварувања. Во воведните четири средби од новата сезона 2026/27 веќе забележа два, остварувајќи просек од 22 поени, 10,5 скока и 9 асистенции по натпревар.