ИСТРАГАТА СЕ ПРОШИРУВА: Ексхумација на уште една жена во случајот со осомничениот од Старо Нагоричане

Истрагата се проширува: Ексхумација на уште една жена во случајот со осомничениот од Старо Нагоричане

Денеска се врши ексхумација на уште една повозрасна жена, за која Јавното обвинителство на Република Северна Македонија има сомнеж дека е жртва на дваесет и петгодишниот овчар од општина Старо Нагоричане, осомничен за убиство, пренесува Нова Македонија.

Од обвинителството информираа дека истрагата се проширува, откако претходно биле обезбедени докази што го поврзуваат осомничениот со повеќе случаи.

Психијатриско вештачење на осомничениот

Како што соопштија од казнено-поправната установа Куманово – затвор К’шање, осомничениот Т.Б. денеска е спроведен во ЈЗУ Универзитетска клиника за психијатрија за психијатриско вештачење.

„По наредба на судија на претходна постапка, осомничениот Т.Б. денеска е спроведен во ЈЗУ Универзитетска Клиника за Психијатрија за психијатриско вештачење. По завршувањето ќе биде вратен во КПУ Затвор Куманово на издржување мерка притвор“, изјави директорот на установата, Оливер Цветковски.

Две убиства и еден обид – ДНК ги поврзува случаите

На вчерашниот брифинг со новинарите, обвинителството соопшти дека истрагата против жител на село Малотино, општина Старо Нагоричане, осомничен за убиство на седумдесет и осумгодишна жена од село Челопек, се проширува за уште едно убиство.

Според досегашните сознанија, постојат докази за две убиства и еден обид за убиство, а ДНК анализата ги поврзува случаите со осомничениот, кој работел како овчар. Претходно била спроведена ексхумација и обдукција на помлада жена.

Од обвинителството информираа дека до Министерството за внатрешни работи се издадени наредби за доставување на сите претходни пријави, поплаки, телефонски јавувања и други информации поврзани со осомничениот, со цел да се утврди дали имало евентуални пропусти во постапувањето.

Претходни кривични пријави

Од СВР Куманово претходно информираа дека против Т.Б. биле поднесени кривични пријави поради основано сомнение за сторени две „тешки кражби“ по член 236 од Кривичниот законик, од деловен објект и приватен имот, како и „кражба“ по член 235 од товарно моторно возило.