Избор на нови членки во Судскиот совет
Вонредната професорка Арлинда Кадри Шахиновиќ и адвокатката Сузана Јошевска-Анастасовска денеска добија поддршка од пратениците и беа избрани за нови членки на Судскиот совет. Одлуката беше донесена на денешната седница на Собранието, по предлог на претседателката Гордана Сиљановска-Давкова.
Во образложението пред пратениците, претседателката нагласи дека при изборот се раководела од нивната стручност, компетентност и професионален интегритет. Таа посочи дека реформските процеси во правосудството мора да ги водат личности кои се препознаени и докажани во својата област.
Сиљановска-Давкова потенцираше дека кандидатките не биле предложени поради родовиот критериум. Според неа, одлучувачка била нивната експертиза и кредибилитет во правната сфера.
Реформи и законски решенија на дневен ред
Претседателката истакна дека вклучувањето на стручни и посветени правници во Судскиот совет може да придонесе за воспоставување јасни и еднакви критериуми при изборот на судиите. Таа оцени дека тоа ќе доведе и до зголемување на нивната одговорност, како и до изготвување аргументирани извештаи со конкретни предлози за надминување на состојбите во правосудството.
Во рамки на истата седница, пратениците во прво читање ги усвоија и предлозите на неколку закони. Меѓу нив се законите за престанување на важењето на Законот за вонсудско спогодување, за изменување и дополнување на Законот за регистар на задолжително социјално осигурување, како и Законот за системот за проценка на лица со попреченост.
Дополнително, беше усвоен и Предлог-законот за задолжување на Република Северна Македонија со заем од Банката за развој при Советот на Европа. Средствата се наменети за дополнително финансирање на проектот за изградба на фискултурни сали.
Во тек е и собраниската расправа по Предлог-законот за изменување и дополнување на Кривичниот законик.