Лажно известување за сообраќаен прекршок резултирало со финансиска загуба
Кавадарчанка пријавила дека завчера била измамена и останала без речиси 30.000 денари поради лажна е-порака.
Вчера во 15.45 часот, во ОВР Кавадарци, 43-годишна жена навела дека претходниот ден била финансиски оштетена за износ од 29.930 денари. Таа објаснила дека на нејзината електронска адреса пристигнала порака која лажно била испратена во име на Одделот за моторни возила при МВР, со наведување дека сторила сообраќаен прекршок и инструкции за електронско плаќање на казната.
Следење на инструкции и одлив од банкарска сметка
Според пријавеното, пораката содржела насоки за електронско плаќање, по што таа се регистрирала според дадените инструкции и ги внела своите лични податоци. Подоцна, таа добила известување дека од нејзината банкарска сметка бил извршен одлив на парични средства, по што сфатила дека станува збор за измама.
„Според пријавеното, на електронската адреса на оштетената била доставена порака која лажно се претставувала како известување од Оддел за моторни возила при МВР за наводно сторен сообраќаен прекршок и со насоки за електронско плаќање на казната, по што таа се регистрирала согласно дадените инструкции и ги оставила своите лични податоци, а подоцна добила известување дека од нејзината банкарска сметка бил извршен одлив на парични средства и сфатила дека била измамена“, соопшти МВР.
Од Министерството информираа дека се работи на расчистување на случајот.