Осомничен за измами врз три повозрасни жени
Полициски службеници од СВР Струмица на 7 февруари го лишија од слобода О.В. (38) од Струмица, кој се сомничи дека во два наврати учествувал во извршување на кривични дела измами.
Според денешното соопштение на МВР, на 6 и 7 февруари 2025 година осомничениот извршил измами на штета на 84-годишна и 68-годишна жителка на Струмица, додека во еден случај се работи за обид за измама врз 77-годишна жителка на градот.
Пронајдени пари и признание пред полицијата
При лишувањето од слобода, кај О.В. биле пронајдени 15.150 евра и 50 швајцарски франци, за кои полицијата наведува дека се стекнати при извршување на кривичните дела. Осомничениот бил задржан во Полициската станица Струмица, каде во службен разговор го признал начинот на кој ги вршел делата.
За настанот бил запознаен јавен обвинител од Основното јавно обвинителство Струмица, а по целосно документирање на случајот против лицето ќе биде поднесена кривична пријава.
Апел за зголемена внимателност
СВР Струмица уште еднаш апелира до граѓаните да бидат исклучително внимателни при комуникација со непознати лица по телефон. Од полицијата потсетуваат да не се наседнува на измами, да се проверуваат информациите што се пласираат во телефонски разговори, да не се даваат пари на непознати лица и сите сомнителни случаи навремено да се пријават во полиција.