Закон за високо образование и автономија на универзитетите
Министерката за образование и наука, Весна Јаневска, одговори на пратеничко прашање од Халил Снопче за можностите средношколците да продолжат студии на мајчин јазик. Таа посочи дека новиот Закон за високо образование нуди можности кои треба да се искористат во рамки на автономијата на универзитетите.
„Апелирам универзитетите да отвораат соодветни студиски програми, факултети, насоки или специјализации од кои државата има потреба“, рече Јаневска.
Финансиска поддршка и развој на кадар
Министерката нагласи дека со новиот начин на финансирање се очекува повеќе средства да стигнат до универзитетите.
„Со доаѓањето на оваа власт драстично е зголемен буџетот за образование, за разлика од претходните седум години. Универзитетот „Мајка Тереза“ и Универзитетот во Тетово можеле да спроведат студиски програми според потребите на пазарот“, додаде Јаневска, потенцирајќи дека државата вложува и во кадарот и во инфраструктурата.
Поврзување со стопанството и корист за општеството
Во однос на иднината на студиските програми, Јаневска истакна дека универзитетите треба да се поврзуваат со компаниите, што е корисно за науката, стопанството и студентите.
„Поврзаноста со стопанството ќе им помогне на учениците и студентите да стекнат знаење и искуство кое директно ќе им користи во кариерата, а целото општество ќе има придобивки“, заклучи министерката.