Не само Грковска, никој не е задоволен од Љубомир Јовевски. Не постои некој којшто е задоволен од неговите резултати како државен обвинител. Ниту, пак, тој покажал претходно некакви резултати, ако бидеме искрени и да си признаеме. Ова се некои негови лични амбиции, да ја продолжи кариерата без да се има трошка самокритика. Дека Обвинителството има сериозни проблеми и дека самиот обвинител е во голема мера виновен за тоа, нема никакви дилеми.
Ова го изјави Гордан Калајџиев, универзитетски професор по кривично право на Правниот факултет „Јустинијан Први“ во Скопје, во интервју за телевизија Телма.
Тој ги коментираше критиките на вицепремиерката Славица Грковска на сметка на Јовевски, на коишто тој остро возврати.
На прв поглед, се чини дека аргументите на републичкиот јавен обвинител до некаде се издржани, кога тоа би се сметало дека е некаков притисок од власта. Меѓутоа, тоа е само привидно. Објективно и тој самиот мора да биде самокритичен, вели професорот Калајџиев и нагласува дека Владата го предлага Јавниот обвинител и затоа тој има одговорност кон неа.