Меси и Роналдо поставија стандарди што тешко ќе се повторат
Ривалството меѓу Лионел Меси и Кристијано Роналдо е нешто што светскиот фудбал тешко дека повторно ќе го доживее, смета поранешниот германски голман Оливер Кан. Легендата на Баерн Минхен истакна дека двајцата великани речиси две децении меѓусебно се мотивирале да бидат сè подобри, создавајќи една од најголемите спортски приказни во историјата.
„Кристијано Роналдо и Лионел Меси се туркаа еден со друг речиси две децении и навистина е неверојатно да се види на кое ниво на фудбал сè уште играат. Нивното ривалство никогаш не беше изградено на зборови, туку на настапи. Секоја сезона се тераа еден со друг да станат уште подобри. Фудбалот можеби никогаш повеќе нема да види ривалство со таква постојаност и извонредност“, изјави Кан.
Бројките најдобро ја покажуваат нивната доминација
Прашањето кој е најдобриот фудбалер на сите времиња – Меси или Роналдо – се поставува речиси две децении. Иако мислењата се поделени, нивните резултати и освоените трофеи ги издвојуваат од сите останати.
Двајцата долги години беа големи ривали во шпанскиот фудбал. Меси беше предводник на Барселона, а Роналдо настапуваше за Реал Мадрид.
Португалецот со Реал освои две титули во Ла Лига и четири трофеи во Лигата на шампионите. Меси, пак, со Барселона стигна до 10 шампионски титули во Ла Лига и четири европски круни.
На индивидуален план, Аргентинецот има освоено осум „Златни топки“, додека Роналдо петпати беше прогласен за најдобар фудбалер во светот.
Ривалството продолжува и на Светското првенство
И двајцата продолжуваат да испишуваат нови страници од фудбалската историја и на актуелното Светско првенство.
Роналдо во кариерата веќе стигна до 975 голови и сè уште ја брка историската граница од 1.000 погодоци. Меси, пак, на овој Мундијал стана најдобар стрелец во историјата на Светските првенства со 19 голови.
Во осминафиналето Португалија ќе игра против Хрватска, додека Аргентина ќе се соочи со Зеленортските Острови.
Меси е најдобар стрелец на досегашниот дел од турнирот со шест голови во групната фаза, додека Роналдо постигна два.
Аргентинецот, кој ја освои светската титула во 2022 година, сега се обидува да стигне до втор последователен трофеј со својата репрезентација. Роналдо, иако во својата богата кариера освои речиси сè, сè уште го нема единствениот голем трофеј што му недостига – титулата светски шампион.
Доколку Аргентина и Португалија се пласираат во финалето, фудбалската јавност би можела да добие уште една, можеби и последна, историска пресметка меѓу двајцата најголеми фудбалери на модерната ера.