Трагедија во Таи По: 44 загинати, стотици исчезнати по големиот пожар во Хонгконг
Најмалку 44 лица загинаа во разорниот пожар што го зафати станбениот комплекс Ванг Фук Корт во областа Таи По во Хонгконг, додека повеќе од 270 жители сè уште не се пронајдени. Властите утрово соопштија дека пожарот е ставен под контрола во четири од вкупно седумте зафатиени згради и дека очекуваат останатите жаришта да бидат изгаснати до вечерните часови. Според податоците, околу 40% од 4.600 жители во комплексот се лица постари од 65 години.
Сомнежи за небрежност и уапсени раководители
Како што пожарот се смирува, се зголемуваат прашањата за причините и можната одговорност. Полицијата уапси тројца раководители на градежни компании на возраст од 52 до 68 години, под сомнение за убиство од небрежност. Според полицијата, на фасадите биле пронајдени запаливи материјали – мрежа, пластични плочи и стиропор – кои не соодветствуваат на стандарди за противпожарна заштита. „Имаме причина да веруваме дека одговорните лица биле крајно небрежни, што довело до неконтролирано ширење на огнот и голем број жртви“, изјави полициски портпарол.
Бамбусовите скелиња и староста на зградите го поттикнале ширењето
Експертите посочуваат дека големата количина бамбусови скелиња поставени околу блоковите придонеле огнот да се шири со исклучителна брзина. Професорот Џијанг Лиминг од Политехничкиот универзитет во Хонгконг истакна дека старите стаклени прозорци од 1980-тите лесно попуштиле под пламенот, овозможувајќи огнот да продре од фасадата кон внатрешноста. Бамбусовите скелиња се традиционална, но запалива конструкција, а властите веќе претходно најавија нивна постепена замена со челични, отпорни на оган конструкции. Пожарот беше класифициран како пожар од петто ниво – највисока категорија на сериозност во Хонгконг.
Причината за избувнувањето сè уште не е утврдена.