Пазарната инспекција од утре на терен ќе врши контроли по маркетите за да види дали се спроведува одлуката за замрзнување на цените на тестенините и млечните производи, објави Макфакс.
Контролите ќе се вршат над производите што ги опфаќаат одлуките за определување највисоки цени за одделни производи во трговијата на мало, односно: тестенини неварени, неполнети, ниту поинаку приготвени, што не содржат обично пченично брашно или гриз, без додаток на јајца (макарони и шпагети), чија највисока цена на овие производи од ставот се утврдува на нивото на цените што се применувале на 1 март 2023 година во трговијата на мало и се намалуваат 15 отсто.
Понатаму, трајното кравјо млеко со масленост од 2,8, 3,2 и од 3,5 %; урда; кравјo бело сирење и мешано бело сирење; кравји кашкавал (со исклучок на кравји кашкавал без додатоци и пармезан); кисело млеко; павлака и јогурт, без додатоци, а највисоките цени на наведените млечни производи се утврдуваат на нивото на цените што се применувале на 1 март 2023 година во трговијата на мало и се намалуваат 10 проценти.
Во случај да се утврди прекршување на одлуките, ќе следуваат казни од 800 до 10.000 евра, во зависност од големината и видот на економскиот оператор.
Државниот пазарен инспекторат објави дека ќе постапува исклучиво по однос на контрола на цените утврдени со одлуките, но нема надлежност да постапува ниту, пак, да влијае врз формирање на цените во трговијата на големо и трговијата на мало.
Апелираат да се почитуваат одлуките, а исто така ги повикуваат граѓаните, доколку забележат неправилности, веднаш да пријават во Пазарниот инспекторат.