Кешишев сведочеше за киднапирањето и убиството на Вања: „Го видов Палчо со пиштол во рака, потоа слушнав истрел“
Обвинетиот и сведок Влатко Кешишев тврди дека сите договори за киднапирањата, вклучително и за девојчето Вања Ѓорчевска, биле меѓу Љупчо Палевски и Велибор Манев, а Палевски бил главниот организатор.
Кешишев со уплав од Палевски, се плаши да сведочи во негово присуство
Пред да ја грабнат Вања од влезот на нејзината зграда во Дебар Маало, Кешишев, Палевски, Манев и Боре Видевски отишле по „Ситроенот“ на веќе убиениот Панче Жежовски, кој бил паркиран во Радишани.
„Јас го отворив гепекот. Прв излезе Боре. Велибор носеше вреќа врзана, не се гледаше што има во неа. Вељо и јас седнавме во „Цитроенот“ напред, Боре беше на задното седиште. Палчо беше до подвозникот на Качанички пат, но не го видов. Кога го видовме до „Реното Кангу“ кај подвозникот, тој возеше пред нас. Ја однесовме во Бразда. Таму сè се заврши, сведочи Кешишев“
Според неговото сведочење, во колата никој ништо не зборувал.
„Излеговме од „Ситроенот“. Палчо ме остави да чувам стража на 20-30 метри, да не наиде некој. Се завртев неколку пати да видам што се случува. Прво разговараа, а за тоа време гепекот беше отворен. Потоа, кога повторно се завртев, видов дека копаат. Последниот пат кога се свртев, Палевски држеше пиштол во рака. Кажувам како што беше. Потоа слушнав истрел, ама некако тапо… Тк, тк… Го затрупавме телото со земја и со стари ќебиња што ги најдовме на буништето.“
Кешишев објасни детално на адвокатот
Според Кешишев, по убиството на Вања, Палевски со средство ВД40 ги избришал двете лопати и копачот, потоа ги ставил во „Кангото“.
„Влеговме во „Кангото“ – јас, Боре, а Палчо возеше. На 500 метри ми кажаа да ги фрлам лопатите и копачот на банкината. „Ситроенот“ го управуваше Велибор и беше зад нас. Потоа продолживме до местото каде што требаше да се запали „Ситроенот“.“
Кешишев тврди дека дури по враќањето во штабот на партијата дознал дека било грабнато и убиено девојче.
„Отидов да правам кафе, тогаш на Фејсбук видов дека се бара дете. Го прашав Палчо што е ова, но тој не ми одговори. Не ми беше јасно за убиствата, а тој не ми одговараше. Се повлеков во собата што ја имав и молчев. Палчо веќе се спремаше за Белград.“
На прашањето дали учествувал во копањето дупка во Бразда, Кешишев одговори:
„Не, само за закопувањето помогнав, за да се заврши побрзо.“
Адвокатот го праша и за оружјето:
„Чиј е пиштолот со кој се убиени Панче и Вања, дали знаете?“
„Моторолите ги купи Палчо, а пиштолот, како што слушнав овде на судењето, бил на Боре. Јас не можам да тврдам. Сè беше ставено во ранецот на Палчо, а тој секогаш си го носеше со себе.“
Судењето продолжува.