КОНТРАОФАНЗИВА ВО ДОБРОПИЉА: Зеленски соопштува за ослободена територија од над 174 квадратни километри и загуби на Русија

Контраофанзива во Добропиља: Зеленски објавува ослободена територија и загуби на Русија

Украинските сили во рамки на контраофанзивата во реонот на Добропиља успеаа да ослободат над 174 квадратни километри територија и да нанесат значителни загуби на руските сили, кои достигнаа речиси 3.200 војници, соопшти украинскиот претседател Володимир Зеленски во своето вечерно видеообраќање.

– Разговаравме одделно со военото раководство за оперативната состојба, а главниот командант го поднесе својот извештај. Контраофанзивната операција во Добропиља продолжува, – изјави Зеленски, изразувајќи благодарност до единиците што учествуваат во акцијата.

Тој наведе дека од почетокот на операцијата украинските сили ослободиле повеќе од 174 км², а уште над 194 км² биле исчистени од руски диверзантски групи.

– Руските загуби во оваа операција изнесуваат околу 3.200, од кои најголемиот дел се неповратно загубени, – додаде претседателот на Украина.

Ситуација во други области

Зеленски информира дека добил и најнови податоци за ситуацијата во Купјанск, во пограничните делови на Харковска област и на границата меѓу Доњецката и Днепропетровската област.

– Ситуацијата таму е тешка, но важно е дека нашите сили прават сè за да ги одбранат своите позиции, – нагласи тој.

Тој ја пофали и украинската единица која со дрон урна руски воен хеликоптер.

– Ова достигнување инспирираше многу Украинци, – рече тој, упатувајќи посебна благодарност до екипажот на баталјонот за беспилотни системи од 59. одделна јуришна бригада.

Зеленски додаде дека е од исклучителна важност украинските производители на дронови и ракети да работат со полн капацитет, бидејќи производствените можности на земјата сè уште не се целосно искористени.