Костадиновска-Стојчевска: Стратешка цел е да бидеме дел од ЕУ како Македонци со македонска култура и македонски јазик

Сакаме да се признае македонската култура, македонскиот јазик, нашата етничка припадност и посебноста што ја имаме како Македонци. Нашата стратешка цел е да бидеме дел од ЕУ, но не сакаме ништо повеќе или помалку отколку што заслужуваат, сакаат или имаат другите земји-членки, истакна министерката за култура Бисера Костадиновска-Стојчевска во интервјуто за албанската телевизија „Топ ченел”.

-Како што неколкупати напомена нашиот премиер, „Да“ нашата стратешка цел е да бидеме дел од ЕУ, но не сакаме ништо повеќе или помалку отколку што заслужуваат, сакаат или имаат другите земји-членки на ЕУ, појасни Костадиновска-Стојчевска.

Во однос на министерскиот состанок за култура на Западен Балкан, министерката напомена дека културата е делот кој го надополнува секој друг сегмент кој е дел од Отворениот Балкан.

– Како Министерство имаме одлична соработка со двете министерства за култура на Албанија и на Србија и со сигурност можам да кажам дека културата ќе биде највидлива на економската страна, спортот и образованието, додаде Костадиновска-Стојчевска.

Според неа министерската платформа за култура, иницијативите и состаноците се секогаш добредојдени бидејќи секогаш е добро сите да се на маса за размена на идеи и практики особено проекти посветени на младите.

– Ние имаме многу млади уметници и Министерството за култура има посебен фонд кој инвестира во нивната работа и развој, но морам да истакнам дека културата во Северна Македонија беше единствената што немаше никакво кратење на финансиите бидејќи културата е сегментот кој на луѓето им требаше повеќе од кога било во овие две години, мислам дека ни претстои интересно лето, рече во интервјуто Костадиновска-Стојчевска.

Министрите ги истакнаа предизвиците со кои се соочуваат со младите и културното наследство на министерскиот состанок за лансирање на Првата министерска платформа на Западен Балкан за култура во Тирана, Албанија организиран од страна на Марија Габриел, европска комесарка за иновации, истражување, култура, образование и млади.

Во моментот се реализираат 13 проекти во висина од 3 милиони евра кои се наменети за Западен Балкан за да се негува и зачува културното наследство.