Постепено укинување на услугите и премин кон PS5
„Sony“ најави постепено укинување на поддршката за PlayStation 4 до пролетта 2026 година. Постоечките игри ќе продолжат да работат нормално, но новите наслови повеќе нема да имаат стари мрежни функции. Компанијата го нагласува преминот кон PS5 и идните проекти.
По повеќе од една деценија на пазарот и со над 115 милиони продадени примероци, PS4 дефинираше цела генерација гејмери. Конзолата лансирана во 2013 година стана дом на ексклузиви како „The Last of Us Part II“, „God of War“, „Marvel’s Spider-Man“ и „Bloodborne“.
Според интерни документи, од пролетта 2026 година ќе престане поддршката за низа „legacy“ услуги на PlayStation Network (PSN) за новите игри. Овие промени ќе влијаат на системите за следење активности на пријателите, споделување скриншоти и видеа, складирање податоци и кориснички поставки, како и на интеграциите со корисничките профили и старите системи за филтрирање несоодветна содржина. Од Sony појаснија дека ова се прави за поунифицирана и поскалабилна платформа и за пренасочување на ресурсите кон PS5.
Постоечките игри и дигиталната библиотека остануваат безбедни
Спротивно на гласините за целосно гасење на серверите на PS4, постоечките наслови и онлајн мултиплеерот ќе продолжат да функционираат нормално. Промените се однесуваат исклучиво на новите игри, чиј развој за старата платформа ќе стане технички покомпликан и помалку исплатлив.
По средината на 2026 година на PS4 се очекува да пристигнуваат главно помали и независни наслови.
Поширока стратегија на Sony и иднината на PlayStation
Укинувањето на старите сервиси е дел од поширока стратегија на Sony. Од јануари 2026 година, понудата на игри во рамките на „PlayStation Plus“ ќе биде првенствено насочена кон PS5, а наслови за PS4 ќе се појавуваат само повремено.
Други големи издавачи исто така постепено ја напуштаат старата конзола поради технички ограничувања и широка достапност на PS5. Производството на сите модели на PS4 беше прекинато во 2022 година, што ја означува јасната насока кон сегашноста и иднината на платформата, симболизирана со PS5 и претстојниот PlayStation 6.