Лицето кое го скрши стаклото на влезната врата на Амбасадата на Република Бугарија во Скопје не е етнички Македонец и станува збор за бездомник.
Ова го соопшти Петар Колев за инцидентот во Скопје. Тој е лидер на бугарска политичка партија во Македонија, во интервју за бугарски медиум, во контекст на реакциите и драматизирањата во Бугарија поврзани со овој инцидент.
Изјава на Колев и реакции во Бугарија
Колев посочи дека е чудно лице кое не е Македонец и живее на улица да изврши ваков чин без дополнителен поттик. Во рамки на дебатата, неговата соговорничка изнесе сомнеж дека можеби станува збор за платена провокација, оценувајќи дека ваквото сценарио во моментот повеќе им одговара на одредени кругови во Софија.
Тој оцени дека настанот се користи како аргумент за наводна системска омраза кон Бугарите во Северна Македонија, иако, според него, темата не би добила вакво внимание доколку не се користи за политички цели.
Споредби и предупредувања за европските средства
Во својата анализа, Колев ги спореди односите меѓу Северна Македонија и Бугарија со односите меѓу Северна и Јужна Кореја, наведувајќи дека политичките режими се клучна причина за застој во развојот. Тој не ја исклучи можноста Бугарија да инсистира на запирање на европските средства за земјава.
„Средствата за пристапување доаѓаат од нашите даноци – од европските земји. Исто како што можат да бидат запрени за Унгарија, можат да бидат запрени и за Северна Македонија“, изјави Колев.
Постапка на Обвинителството
Во меѓувреме, Основно јавно обвинителство – Скопје информира дека е поведена постапка против 55-годишно лице, осомничено дека на 11 јануари со камен го скршило стаклото на вратата на Амбасада на Република Бугарија во Скопје.
Според соопштението, осомничениот „од омраза ја оштетил влезната врата на Амбасадата на Република Бугарија, така што со камен го скршил стаклото и веднаш се одалечил во непознат правец“. Јавниот обвинител доставил предлог за определување мерка притвор, поради опасност од бегство и можност делото да биде повторено.