Студенти и граѓани утринава се собраа пред Специјалниот суд на улицата „Устаничка“ во Белград по повод почетокот на судењето за случајот „Генералштаб“. Меѓу обвинетите е и министерот за култура на Србија, Никола Селаковиќ, кој пристигна во судот и беше пречекан со свирежи и скандирања „Мафијата во затвор!“ и „Министри, крадци!“, објави „Нова“.
Студентите во блокада на белградските факултети претходно најавија дека ќе одржат собир во 10 часот, кога започнува главната расправа. Тие подготвиле и писмо што планираат да му го предадат на судот.
Во писмото, како што пренесува „Нова“, студентите наведуваат дека не сакаат да влијаат врз судската одлука, туку да укажат на јавниот интерес за постапка од значење за владеењето на правото и заштитата на културното наследство. Посочуваат дека, според Обвинителството, при укинувањето на статусот културно добро на комплексот биле прекршени клучни одредби од Законот за културно наследство и Уставот на Србија, како и дека постои основано сомневање за злоупотреба на службената положба и фалсификување службени исправи. Според нив, исходот може да има пошироки системски последици врз функционирањето на институциите и довербата на јавноста, па очекуваат судот законито и транспарентно да одлучи врз основа на доказите.
Јавното обвинителство за организиран криминал претходно соопшти дека, покрај Селаковиќ, во постапката се обвинети и секретарката во Министерството за култура Славица Јелача, в.д. директорот на Републичкиот завод за заштита на спомениците на културата Горан Васиќ и в.д. директорот на Заводот за заштита на спомениците на културата на Град Белград, Александар Ивановиќ.
Осомничените се товарат за две кривични дела – злоупотреба на службената положба и фалсификување службена исправа – поврзани со укинувањето на статусот културно добро на зградите на „Генералштабот“.