Сообраќајот се одвива непречено, но условите се отежнати
Иако сообраќајот на државните патишта низ земјава се одвива непречено и по претежно суви коловози, маглата создава отежнати услови за возење на повеќе патни правци, информираат од Автомото сојузот на Македонија.
Намалена видливост од 100 до 200 метри е регистрирана на правците Тетово – Скопје – Куманово – Кочани – Сарамзалино – Велес – Неготино – Демир Капија. Погуста магла, со видливост до 50 метри, има на делниците Битола – Прилеп – Ѓавато – Ресен – Македонски Брод – Кичево, како и во правец кон Дебар.
Умерен сообраќај и без задржувања на границите
Интензитетот на сообраќај надвор од градските средини е умерен. На граничните премини од македонска страна нема подолги задржувања за влез и излез од државата.
АМСМ со апел и потсетник за зимската опрема
Од АМСМ апелираат возачите да ја прилагодат брзината на движење, да ја почитуваат сообраќајната сигнализација и внимателно да управуваат со возилата, особено на патиштата низ котлините, речните долини и клисурите, каде што постои опасност од одрони. Ова посебно се однесува на делниците Катланово – Велес, Маврово – Дебар – Струга, Виница – Берово и Кочани – Делчево.
Од Автомото сојузот потсетуваат дека од 15 ноември 2025 година е во сила законската обврска за задолжително поседување зимска опрема во возилата, без оглед на временските услови, која ќе трае до 15 март 2026 година.