МАКЕДОНИЈА НЕ ПОДДРЖУВА КАМПОВИ ЗА ОДБИЕНИ АЗИЛАНТИ: Земјата е дел од Европа и нејзините политики, вели Димитровски од Виена

Дискусија со експерти за миграција

Македонија, како и другите земји од Западен Балкан, останува целосно усогласена со европските политики за миграции и не размислува за отворање кампови за враќање на одбиени баратели на азил. Ова го потенцираше заменик-министерот за надворешни работи и надворешна трговија, Зоран Димитровски, кој учествува на годишната Конференција за миграции во Виена, организирана од Меѓународниот центар за развој на миграциските политики – ИЦМПД.

Во рамките на конференцијата „Западен Балкан: Регионални перспективи за миграцијата и партнерствата“, Димитровски имаше посебен разговор со генералниот директор на ИЦМПД, Михаел Шпенделегер, фокусирајќи се на предизвиците и можностите што ги носи променливата миграциска слика во регионот.

Предизвици и можности за регионот

 За време на разговорот беше истакнато дека Западен Балкан се наоѓа на уникатна пресвртница во управувањето со миграциите, како регион кој е и место на потекло, транзит, но сè повеќе и дестинација за мигрантите. Овој динамичен контекст носи нови предизвици, но и економски можности, особено во услови на зголемена побарувачка за работна сила и недостиг на работници во клучни сектори, се наведува во соопштението на МНРиНТ.