Одлука за второто место во директен дуел со Велс
Македонската фудбалска репрезентација вечерва во 20:45 часот ќе го одигра последниот и решавачки натпревар од квалификациите за Светското првенство 2026, на гостински терен против Велс во Кардиф. Избраниците на селекторот Благоја Милевски влегуваат во мечот со јасна цел – да останат непоразени и со тоа да обезбедат историски пласман во баражот за Мундијалот. Двата тима се израмнети на табелата со по 13 бодови, зад водечката Белгија која има 15, но Македонија има значително подобра гол-разлика.
Јасни сценарија за пласманот
Излезот од квалификацискиот циклус е прецизно дефиниран: нерешен резултат или победа за Македонија значат освојување на второто место и пласман во баражот, додека евентуален триумф на Велс би ги поставил домаќините на втората позиција. Постојат и минимални шанси за директен пласман – Македонија мора да слави во Кардиф, а Белгија да загуби од Лихтенштајн. Нашата селекција останува единствената во групата која досега нема претрпено пораз.
Барди: „Да бидеме горди, да трчаме и да оставиме срце на терен“
Капитенот Енис Барди на прес-конференцијата го истакна значењето на натпреварот и потребата од максимална психолошка подготвеност. Тој порача дека тимот мора да ужива во играта, но и да покаже борбеност, дисциплина и висока енергија. „Треба да бидеме релаксирани, горди и да уживаме на теренот. Кога велам да уживаме, мислам да се бориме, да трчаме и да оставиме срце на терен,“ изјави Барди, додавајќи дека очекува силен притисок и агресивност од домаќините.