Во тешка сообраќајна несреќа во Грција загинаа двајца, а четворица се повредени, меѓу кои македонска државјанка и тројца грчки полицајци. Според грчките медуми, во сообраќајката учествувале три автомобили и чопор диви свињи, а се случила синоќа околу 23:30 часот, на 62-от км од новиот национален автопат Солун – Нео Петрициу, во Кукуш.
Патролно возило управувано од 42-годишен полицаец во кое како сопатници биле и двајца негови колеги на возраст од 44 и 36 години се судриле со чопорот диви свињи кои поминувале и излетале од својата лента.
Како што пишуваат грчките медиуми, возило управувано од 56-годишен странец, државјанин на Македонија со 50-годишна сопатничка се судрило во истото стадо, се превртело и паднало во соседната нива.
Трето возило со 53-годишен локален возач и 48-годишен сопатник се судрило со службеното полициско возило, при што животот го загубиле и двајцата патници во третиот автомобил.
Повредени се 50-годишната сопатничка од второто возило и тројцата полицајци, кои се задржани на лекување во Општата болница во Кукуш.
Во тек е истрага за причините за несреќата.