Максим Димитриевски денеска беше едногласно реизбран за претседател на партијата Движење ЗНАМ – За наша Македонија на вториот партиски конгрес. Тој најави дека ЗНАМ ќе дејствува како коректор на власта, која, според него, заслужува шанса бидејќи ја добила довербата од граѓаните на изборите.
Неговата партија моментално има 2 министри во владата предводена од Мицкоски.
„ЗНАМ не е ниту ВМРО-ДПМНЕ, а уште помалку СДСМ. ЗНАМ е гласноговорник на народот и коректор на власта. Оваа власт заслужува шанса затоа што граѓаните тоа го одлучија на избори“, изјави Димитриевски.
По неговиот реизбор, тој рече дека партијата презема голема одговорност да создаде нова политичка сила која работи за граѓаните, додавајќи дека нивната идеологија влече корени од Крушевскиот манифест и АСНОМ. Тој вели дека никој нема да избега од одговорност, обвинувајќи дека „волци облечени во јагнешки кожи“ плаќаат медиуми и инфлуенсери за ширење лаги против луѓе од кои се плашат.
Во однос на уставните измени за внесување на Бугарите, Димитриевски изјави дека пратениците на ЗНАМ нема да дадат поддршка доколку претходно не се направи јасна дистинкција за македонскиот јазик, потврдена во европска институција.
Извор: СДК