Маж загина откако активирал експлозивна направа пред локална продавница во Хрватска. Според неофицијални информации од жители на населбата, лицето е едно од двајцата мажи кои често престојувале на тоа место. Истите извори велат дека се работи за лица во тешка социјална и психичка состојба.
„Тие се таму секој ден. Стојат пред продавницата и пијат. Очигледно се соочуваат со сериозни проблеми, но никој не презема ништо за нивната состојба“, изјави една жителка од населбата.
Според сведоштвата на неколку жители, лицата што редовно престојувале пред продавницата биле познати на локалната заедница.
- „Овие луѓе се тука постојано. Сите знаат за нив, сите гледаат, но никој не се грижи. Никој не прашува дали им треба помош. Чекавме да се случи нешто вакво за некој да реагира“, изјави жителка од околината.
Во моментот на инцидентот, настава се одвивала во основното училиште кое се наоѓа на помалку од еден километар од местото на експлозијата. Според достапните информации, наставниците ги задржале учениците во училишниот објект.
Очевидци наведуваат дека немало ученици во близина на продавницата за време на експлозијата.
„Наставниците веднаш реагираа. Ги задржаа децата во училиштето и не дозволија никој да излезе додека не заврши увидот. Да биле на одмор или надвор, можеше да биде многу полошо“, изјави еден од жителите што се затекнал во близина.
Во моментот на настанот, во продавницата имало вработени. Според достапните податоци, нема повредени, но дел од нив се во шок. Објектот бил затворен, а полицијата започнала увид на теренот.
Истрагата има за цел да утврди како дошло до експлозијата пред локалната продавница и во кои околности била активирана експлозивна направа.
Полицијата продолжува со увид на терен. Се очекува официјално соопштение од Министерството за внатрешни работи во текот на денот. До тој момент, не се објавени дополнителни детали за идентитетот на загинатото лице.