Настан во училиштето „Кире Гаврилоски – Јане“ со порака за сигурен интернет
Во Прилеп денеска се одбележа Меѓународниот ден на побезбеден интернет – 11 февруари, со акцент на важноста на дигиталната безбедност за децата и младите. Настанот се одржа во ООУ „Кире Гаврилоски – Јане“, во присуство на градоначалникот Дејан Проданоски и министерот за дигитална трансформација, Стефан Андоновски.
Активностите беа реализирани преку проектот MKSafeNet – Центар за побезбеден интернет на Македонија. Настанот им овозможи на учениците, родителите и наставниците практични алатки и насоки за безбедно користење на интернетот. Главниот фокус беше на превенција, родителска контрола и создавање сигурна дигитална средина.
Едукативни и интерактивни активности за учениците
Учениците учеа како да препознаваат ризици во онлајн просторот и како одговорно да ги користат дигиталните содржини. Преку разговори и практични примери беше истакнато дека интернетот може да биде простор за знаење, креативност и развој, но само ако се користи внимателно и со поддршка од возрасните.
„Безбедниот интернет не е избор, туку обврска на сите нас – институциите, училиштата, родителите и младите. Само со заеднички пристап можеме да создадеме сигурна дигитална средина“, беше пораката упатена од настанот.
Од Општина Прилеп потенцираат дека соработката со Министерството за дигитална трансформација ќе продолжи и во наредниот период, со цел унапредување на дигиталната писменост и зајакнување на услугите за најмладите.