Стабилизација на цените на храната и речиси нулта инфлација во април

Цените на основните прехранбени производи остануваат стабилни, а инфлацијата речиси и да не постои, благодарение на владините антикризни мерки, изјави министерот за економија Бесар Дурмиши на денешната прес-конференција.

Според податоците што ги презентираше министерот, годишниот раст на цените на храната изнесува само 0,3%, додека во споредба со крајот на 2024 година, има намалување од 1,3%. Инфлацијата во април е речиси нула, а на годишно ниво изнесува 2,6%, што укажува на стабилизирање на економските текови.

„Економијата е постабилна, граѓаните не се соочуваат со неподносливи поскапувања“, изјави Дурмиши, посочувајќи дека најголема заслуга имаат мерките за ограничување на маржите на основните прехранбени и хигиенски производи, воведени од почетокот на годинава.

Индустриското производство во март порасна за 5,2% – Мицкоски ја поздрави позитивната вест

Владата подготвена за нови чекори ако цените повторно пораснат

Министерот истакна дека државата е подготвена да реагира ако трговците се обидат да ја злоупотребат ситуацијата. Во таа насока, се разгледуваат неколку можни нови мерки:

  • Проширување на листата на производи со ограничени цени

  • Воведување маржи за сите производи

  • Зголемување на постојните ограничувања

„Секојдневно ја следиме динамиката на цените преку соработка со Пазарниот инспекторат. Засега нема значителни покачувања, но подготвени сме да интервенираме веднаш ако е потребно“, нагласи Дурмиши.

Извор: Плусинфо