МЕСИ И АРГЕНТИНА ЗА НОВО ФИНАЛЕ: Англија е најтешкиот тест за светскиот шампион

Светскиот шампион вечерва се соочува со селекцијата која играше две последователни европски финалиња

Актуелниот светски првак Аргентина вечерва го очекува најтешкиот предизвик досега на Мундијалот – полуфиналниот дуел против Англија.

Англичаните во последните две изданија на Европското првенство стигнаа до финалето, но во двата наврати останаа без трофејот.

Селекторот на Аргентина, Лионел Скалони, порача дека пласманот во полуфиналето на Светското првенство е посебен момент, без оглед на претходните успеси.

„Верувам дека играњето полуфинале на Светското првенство е нешто уникатно. Точно е дека веќе сме играле еднаш финале, но како никогаш да не сме играле. Исто толку сме среќни, вознемирени и охрабрени што можеме да им понудиме на нашите луѓе уживање и да ја видат нивната репрезентација како дава сè од себе. Пред нас имаме голем ривал кој ќе ги отежни работите, кој ќе се обиде да се пласира во финалето, а ние сме во исчекување“, изјави Скалони.

Англија и Аргентина за место во финалето

Натпреварот меѓу Англија и Аргентина ќе се одигра вечерва од 21 часот во Атланта.

Првиот финалист веќе е познат. Шпанија обезбеди место во завршниот меч по победата над Франција со 2:0 во полуфиналето одиграно во Далас.