Министерот за внатрешни работи негира селективност
Министерот за внатрешни работи, Панче Тошковски, од собраниската говорница ја демантираше тезата за селективен пристап во истрагата за пожарот во Кочани и огромната трагедија, потенцирајќи дека за разлика од други трагедии, како што се случаите Модуларна болница во Тетово, Ласкарци и Беса Транс во Бугарија, во кои МВР не поднело ниту една кривична пријава, за Кочани досега се поднесени две кривични пријави против 34 физички и три правни лица, при што 31 лице се веќе во притвор.
„За Модуларната, за Беса Транс, за Ласкарци – нула. За Кочани досега имаме 34 лица опфатени со кривични пријави, и тоа не затоа што се или не се членови на некоја партија, туку затоа што има материјални докази за основи на сомнение,“ рече Тошковски.
Пратениците Миле Талевски (СДСМ) и Блерим Беџети (ДУИ) поставија прашања поврзани со истрагата за пожарот во Кочани, посочувајќи дека не се опфатени лица што имале одговорност вечерта на трагедијата, како и дека началникот на криминалистичката полиција во Кочани, Томо Донев, не е опфатен.
„За разлика од времето кога вашите луѓе ги наградувавте со медали за присуство на настани, сега за Томо Донев се води дисциплинска постапка во МВР. Ако се утврди дека сторил повреда или постојат докази дека делувал во интерес на политичка партија – ќе одговара,“ рече министерот.
Талевски го обвини министерот за политички мотиви и го повика да даде оставка, а во своето прашање го спомна и притворениот припадник на МВР, член на обезбедувањето на премиерот Христијан Мицкоски, кој е осомничен за тргување со информации.
„Стигнавме до време кога секој што се огрешил, од кој било политички табор, ќе одговара. Во ваше време тоа беше невозможно. Не само што немаше процес, туку не смеевте ни да ги погледнете тие луѓе во очи,“ одговори Тошковски.
Тој прецизираше дека истрагата за пожарот во Кочани е во тек, и допрва ќе се види колку лица ќе бидат дополнително опфатени, согласно процесните дејствија од Јавното обвинителство и МВР.
На прашањето за одговорноста на Министерството за економија за издавање на спорната лиценца, Тошковски одговори со контра-прашање:
„Кој го одржуваше тој бизнис отворен? Колку години кадри на ДУИ беа министри за економија? Зошто јас сега треба да одговарам за незаконитости што траеле со години?“
Министерот додаде дека, без оглед на политичка припадност, ќе има одговорност за секој кој згрешил:
„Да ви е брат – ќе одговара. Јас нема да ја осуетам постапката по ниту една основа,“ рече Тошковски.