Кралството Норвешка е уште еден позитивен пример на земја сојузничка која во овие изминати години дава помош и стручна поддршка за развој на одбранбените капацитети, а со тоа и директно да влијае во зајакнување на мирот, безбедноста и стабилноста на регионот и Алијансата, истакна министерот Владо Мисајловски на денешната средба со амбасадорката на Кралството Норвешка Кристин Мелсом во Министерството за одбрана.
„Искрена благодарност за досегашната соработка и континуираната поддршка од страна на Кралството Норвешка, за бројните донации за модернизација, опремување и зајакнување на капацитетите на Армијата, но и за сите обуки и поддршка за развој на персоналот и Центрите за обука кои се во рамки на Министерството за одбрана“, рече министерот Мисајловски.
Амбасадорката Мелсом ја потврди силната соработка меѓу двете сојузнички земји и порача дека Кралството Норвешка ќе продолжи да придонесува во развој на одбранбените капацитети и во регионалните иницијативи како што се Балканските медицински наменски сили и Регионалниот центар за односи со јавност.