Да пренесеме порака до младите дека овие луѓе треба да се слават и секоја генерација треба да знае за хероите што го дале животот за Македонија. Тоа се хероите на државата – истакна денеска министерот за одбрана Владо Мисајловски на отворањето на Централниот меморијален турнир во мал фудбал во чест на загинатите бранители од 2001–2015 година.

Мисајловски, пред членовите на семејствата на загинатите и фудбалските екипи, порача дека не ни сакал ваквите немили настани да се повторат и дека Министерството за одбрана, МВР и Бирото за јавна безбедност прават се овие херои да не се заборават.

Сме имале немили настани, да не се повторат, но затоа со вакви спортски игри, меѓународни активности што ги имаме и во Министерство сакаме да покажеме и да допринесеме дека со различни спортски дисциплини и со фер плеј и со една заедничка стратегија сите генерации да се сплотат во оваа енергија и во оваа прилика да покажеме кон целиот македонски народ, кон сите дека овие херои не се заборавени – рече Мисајловски.

Министерот нагласи дека секој еден војник што ја носи оваа униформа многу значи за државата.

Јас сакам во мое лично име да се заблагодарам на сите оние што ја носат униформата, секој еден ден што се на која било локација, на кој било настан, вежба и акција и тоа го прават заради Македонија. Го почитувам тоа што го правите и верувајте дека Министерството за одбрана, БЈБ и МВР секогаш ќе бидат тука – рече Мисајловски.

Директорот на Бирото за јавна безбедност Александар Јанев истакна дека овој турнир се одржува со цел никогаш да не ги заборавиме бранителите, кои ги дале своите животи за нашата татковина. Сподели дека во 2001 година и тој загубил другар и колеги со кои делел училишни клупи.

Нашата обврска, еве и јас од мое лично име како прв човек на БЈБ, имам лична мотивација уште повеќе и уште подлабоко да го негуваме споменот на нив, за животите што ги положија. Знам дека посебно е најтешко за семејствата, знам дека ниту еден збор, ниту една традиција, симболичен момент, не може да ја ублажи вашата болка, меѓутоа исто така знам дека ние даваме се од себе како институции кои загубиле свои припадници, луѓе кои ги положиле своите животи, сме правеле и ќе правиме и во иднина се повеќе за вас за да може таа болка да биде што е можно помала и да знаете дека не сте сами – рече Јанев пред членовите на семејствата на загинатите бранители.

Покровител на турнирот е Министерството за внатрешни работи, а се организира во соработка со МО, БЈБ и здруженијата на загинатите бранители.