Раст на инвестициите и економски развој
Премиерот Христијан Мицкоски најави дека Македонија ќе биде земја со најголем број странски инвестиции по глава на жител во регионот. Според него, Народната банка утре ќе ги објави официјалните податоци за 2024 година, кои покажуваат историски раст на инвестициите од мај наваму.
„За годинава имаме не помалку од 15 странски инвестиции, но бројката постојано се зголемува. Наскоро ќе бидете сведоци на поставување камен-темелници и почеток на нови производствени капацитети,“ изјави Мицкоски во одговор на пратеничко прашање.
Тој потенцираше дека не треба да се занемарат и домашните инвестиции, кои ќе бидат поддржани преку унгарскиот кредит.
Интерес од големи компании за енергетски проекти во Македонија
Осврнувајќи се на турскиот „Казанџи холдинг“, премиерот информираше дека ова не е единствената компанија заинтересирана за вложување во изградба на когенеративни централи во Македонија.
Прес-конференција на претседателот на Владата Мицкоски и претставник на Казанчи Холдинг групацијата
„’Казанџи холдинг’ е само една од неколкуте компании кои изразија желба за инвестиции. Овие проекти ќе се реализираат под пазарни услови – произведената електрична енергија ќе се продава на слободниот пазар, а цената на топлинската енергија ќе ја регулира Регулаторната комисија. Владата нема да се меша во одлуките кој да гради или кој да инвестира, што е суштинска разлика од претходните влади,“ нагласи Мицкоски.
Со ова, Македонија очекува значителен економски развој, привлекување нови инвестиции и зајакнување на енергетскиот сектор.
Извор: Миа