Судскиот систем е извор на незадоволство

„Очекувам членовите на Судскиот совет да покажат доблест и сами да се повлечат“, ова е пораката од премиерот на Република Македонија, Христијан Мицкоски. Тој истакна дека јавноста е незадоволна од функционирањето на судско-обвинителскиот систем. Според него, овој систем е исполнет со бројни контроверзии и скандали, а за да се постигне правда, потребни се суштински промени.

„Во изминатите месеци детално се запознавав со начинот на кој функционира судско-обвинителскиот систем, процесот на избор, институционалната меморија и сите аспекти поврзани со него. Кога нешто не знам, се трудам да го научам. Заедно со министерот, тимот во Министерството за правда, пратениците и стручните лица, анализираме, разменуваме искуства и бараме решенија. Граѓаните не се задоволни од овој систем, бидејќи тој претставува едно мочуриште преполно со скандали и контроверзии“, изјави Мицкоски.

Судскиот совет треба да биде ослободен од партиски влијанија

Премиерот нагласи дека мора да се избере нов Судски совет, кој ќе работи без партиски притисоци и ќе обезбеди фер и независно судство.

„Не можеме целосно да го распуштиме системот, ниту за кратко време да ги откриеме сите неправилности. Но, можеме да формираме Судски совет кој објективно и независно ќе функционира, без партиски притисоци и лични интереси. Овој нов состав треба да го разбистри политичкото мочуриште и да врши надзор врз судиите, нивните одлуки и мотивите зад тие одлуки“, потенцираше тој.

Изјава за медиуми на претседателот на Владата, Христијан Мицкоски

Ваквата порака следува откако утрово премиерот најави дека ВМРО-ДПМНЕ ќе покрене иницијатива со која ќе има темелни реформи во правосудството.

Мицкоски пресече – следува разрешување на членовите на Судскиот совет

Интерпелација како чекор кон реформи

Мицкоски истакна дека интерпелацијата на членовите на Судски совет е неопходна за вистински промени во правосудниот систем.

„Мора да преземеме одлучни чекори. Не смееме да правиме привремени импровизации, туку треба директно да се соочиме со проблемот. Парламентот има надлежност да ги избере членовите на Судскиот совет, а со тоа има и право да гласа за нивната интерпелација. Вистина е дека и по изгласана интерпелација тие можат да останат на функција. Но, ако институцијата што те избрала ти изгласа недоверба, а ти продолжиш да се спротивставуваш, тоа е неприфатливо. Сепак, постојат и други механизми за справување со таква ситуација“, нагласи премиерот.

Повик за доблест и повлекување

Според Мицкоски, ако Собранието изгласа интерпелација, членовите на Судскиот совет треба да покажат одговорност и сами да се повлечат.

„Очекувам доколку парламентарците изгласаат недоверба или интерпелација на членовите на Судскиот совет, тие да покажат доблест и сами да се повлечат“, заклучи тој.