Повик за единство и соживот
Премиерот и претседател на ВМРО-ДПМНЕ, Христијан Мицкоски, од Брвеница порача дека секој што зборува за етнички поделби не му мисли добро ниту на Македонците ниту на Албанците. Тој остро ги критикуваше повиците на кандидатите од коалициите ВРЕДИ и ДУИ кои, според него, повикувале на гласање по етничка линија.
„Таков себичен потег Македонија не видела“
Мицкоски истакна дека е разочаран од ваквите изјави, оценувајќи дека станува збор за „себичен потег“ без преседан во поновата македонска историја.
„Замислете што ќе се случува сега во Тетово, во Дебар, Струга и други општини. Тоа е кусоглед интерес на поединци кои не мислат на заедничкото добро“, изјави Мицкоски.
Брвеница како пример за заедништво
Кандидатот за градоначалник на Брвеница, Јовица Илиевски, истакна дека општината е пример за мултиетничка заедница која функционира преку проекти и рамномерен развој. „Без разлика на етничка или верска припадност, сите села и населени места се подеднакво застапени. Повиците за поделба не носат добро на никого“, порача Илиевски.
Мицкоски додаде дека, и покрај првичните изјави на Биљал Касами, коалицијата ВРЕДИ сепак нема да го поддржи кандидатот на ДУИ во Кичево. Во однос на повиците за предвремени парламентарни избори, тој повтори дека нема потреба од нив, но предупреди дека „оние кои тоа го посакуваат треба да внимаваат – желбата може и да им се исполни“.