Премиерот Христијан Мицкоски во обраќањето пред Постојаниот комитет на Парламентарното собрание на НАТО испрати јасна порака: потребен е механизам за спречување блокади по билатерална основа, како гаранција за зачувување на колективните цели на Алијансата.
Солидарноста меѓу сојузниците
Мицкоски се осврна на трагедијата што се случи во Кочани на 16 март, кога животот го загубија 59 млади луѓе, а над 150 беа повредени. Тој го потенцираше меѓународниот одговор како пример за солидарноста меѓу европските држави.
„Нашата нација неодамна беше погодена од длабока трагедија. Во пожар во ноќен клуб во Кочани, изгубивме 59 млади животи, а над 150 лица беа повредени. На огромна жал, вчера почина и Александар Карадаковски, и покрај напорите на лекарите кои се бореа до последниот момент. Оваа трагедија ни покажа колку животот е кревок, но и колку е силна солидарноста меѓу пријателите. Девет европски држави веднаш понудија поддршка, додека Европската Унија преку механизмот за цивилна заштита овозможи медицински евакуации на повредените кон специјализирани болници во регионот,“ истакна Мицкоски.
Членството во НАТО како обврска, не само статус
Премиерот подвлече дека членството во НАТО за Македонија претставува активна одговорност, со фокус на стабилноста и безбедноста на Алијансата.
„Во последните пет години од нашето членство во НАТО, земјата активно придонесува кон колективната стабилност. Нашите сили се дел од мисиите во Косово и Авганистан, а буџетот за одбрана го зголемивме над 2% од БДП. Учествувавме во вежби за цивилна подготвеност и придонесовме во фондот за одговор на пандемии. Сето тоа покажува дека сме подготвени да преземеме одговорност – и во мир, и во криза,“ посочи премиерот.
Тој дополни дека преку модернизација, подобра интероперабилност и интеграција во НАТО-системите за воздушна и ракетна одбрана, државата ги зголемува своите капацитети.
Повик за механизам за спречување блокади по билатерална основа
Клучната точка во говорот беше повикот за воспоставување на механизам против блокади на билатерална основа, кој ќе овозможи заштита на колективниот интерес од национални несогласувања.
„И покрај нашата непоколеблива лојалност кон заедничките цели, реалноста е дека не секогаш добиваме третман што го заслужуваме. Искреното пријателство значи и искреност во тешки моменти. Дали е прифатливо билатерален спор да ја блокира колективната волја? Ако сите заедно ја чуваме куќата, сите имаме право да ги изразиме своите очекувања, разочарувања и ставови,“ рече Мицкоски.
Тој посочи дека ваков механизам против блокади ќе овозможи поефикасно и правично функционирање на Алијансата.
Конкретни цели, заеднички вредности
Во завршницата, Мицкоски порача дека Република Македонија останува доследна на темелните вредности на Алијансата.
„Ќе продолжиме да инвестираме во човечкиот капитал, дигитална отпорност и брза реакција. Но, најважно од сè – ќе останеме лојален партнер, посветен на демократијата, слободата, владеењето на правото и солидарноста. Нека оваа трагедија нè потсети дека човечноста и заедништвото се нашето најсилно оружје,“ заклучи премиерот.