Партнерство за иновации, претприемништво и технолошки развој
Премиерот Христијан Мицкоски денеска беше дел од настанот каде што беше потпишан меморандум за соработка помеѓу Агенцијата за иновации, научно-технолошки развој и претприемништво (ИНОВА) и државните универзитети. Меморандумот има за цел да ја зајакне врската помеѓу образованието, науката и економијата, како и да овозможи развој на иновациите, технологијата и претприемништвото.
„Образованието не е трошок – тоа е најсилната инвестиција во иднината на државата. Во секое училиште што го градиме, ја градиме и силата на нашата татковина. Нелсон Мандела рекол „Образованието е најмоќното оружје кое можеш да го употребиш за да го промениш светот“. Затоа, ми претставува чест што денес сум дел од овој настан, кој е посветен на унапредување на соработката помеѓу клучните чинители во развојот на науката, иновациите, претприемништвото, технолошкиот развој и знаењето“, изјави Мицкоски.
Тој додаде дека ваквите иницијативи се од суштинско значење за создавање услови за развој на младите кадри, нивно задржување во државата и активно вклучување во економскиот развој.
Поврзување на образованието, науката и економијата
„Иницијативата на Агенцијата за иновации, научно-технолошки развој и претприемништво (ИНОВА) за воспоставување на соработка со државните универзитети претставува важен чекор во насока на подобро поврзување на образованието, науката и економијата. Во услови на брзи глобални промени, ваквите партнерства се неопходни за создавање одржливи и долгорочни резултати“.
„Улогата на министерството за образование и наука, како и на универзитетите, е од особено значење во градењето на систем кој ќе овозможи развој на квалитетен кадар, подготвен да одговори на современите предизвици. Истовремено, поврзувањето со приватниот сектор и институциите создава основа за поефикасен трансфер на знаење и технологии“.
„Фокусот на ова партнерство е во согласност со нашите стратешки приоритети, а тоа се: поттикнување на иновациите, поддршка на претприемништвото и стартапите, како и развој на конкурентна економија базирана на знаење“.
Мицкоски истакна дека меморандумот испраќа силна порака за заеднички активности и развој на економијата, стартапите и конкурентноста на компаниите.
Очекувања за економски развој и поддршка на младите
„Потпишувањето на овој меморандум за соработка претставува силна порака дека заедно можеме повеќе, дека преку партнерство можеме да создадеме услови за развој на претприемништвото, за поддршка на стартапите, за зголемување на конкурентноста на нашите компании и за изградба на економија базирана на знаење“.
Тој додаде дека иницијативата отвора простор за подлабока соработка помеѓу универзитетите, институциите и бизнис секторот, што ќе резултира со нови проекти и заеднички истражувања со реална примена.
„Очекувам дека преку заеднички активности ќе се унапреди иновацискиот и технолошкиот екосистем, ќе се поттикне претприемачкиот дух кај младите и ќе се создадат нови можности за развој и раст. Како Влада, остануваме посветени на поддршка на иницијативи кои придонесуваат за економски развој, иновации и подобра поврзаност помеѓу институциите“.
На крајот, премиерот им честиташе на сите учесници и изрази уверување дека партнерството ќе донесе конкретни резултати и долгорочни придобивки за целото општество.