Американскиот претседател Доналд Трамп денеска упати апел до Конгресот итно да одобри дополнителни финансиски средства наменети за модернизација на системот за контрола на воздушниот сообраќај во Соединетите Американски Држави. Ова барање следува откако пред два дена воздушниот простор над земјата беше блокиран повеќе од четири часа поради сериозен технички дефект.
„Доколку Конгресот ги одобри преку потребните средства за контрола на воздушниот сообраќај, можеме да ја изградиме брзо и ефикасно. Тоа ќе биде НАЈДОБРИОТ СИСТЕМ во целиот свет“, објави Трамп.
Трамп директно ја обвини администрацијата на поранешниот претседател Џо Бајден за лошата состојба и застареноста на инфраструктурата во авиосообраќајот.
„Голем дел од нашиот сегашен систем за контрола на воздушниот сообраќај е стар 50 години. АПСУРДНО! Веќе започнавме со работа, но тоа мора да се направи одеднаш, а не парче по парче. Конгресот мора да ги одобри средствата. Администрацијата на Бајден го врати овој процес неколку години наназад!“, посочи Трамп.
Министерот за транспорт на САД, Шон Дафи, изјави дека причината за инцидентот најверојатно произлегува од мрежен рутер инсталиран од компанијата „Ел3Харис“ во рамките на модернизацијата на комуникациската мрежа. Спорниот уред почнал да генерира повеќе од 1.000 барања за поврзување на секои четири до пет секунди, што предизвикало целосно преоптоварување на системот и ги блокирало операциите во 17 од вкупно 22 регионални центри за контрола на летовите.
Истражителите сè уште утврдуваат дали се работи за хардверски дефект на самиот уред или пак за грешка направена при инсталацијата. Според досегашните официјални наоди, нема никакви индикации или докази дека станува збор за кибернапад.
Застарената опрема со години претставува клучен проблем во авиосообраќајот, со оглед на тоа што дел од мрежните уреди функционираат повеќе од 25 години. Федералната управа за авијација сè уште користи дискети, децениски стари компјутери и набавува резервни делови преку интернет, поради што Дафи инсистира на целосна изградба на комуникациската мрежа, радарите и компјутерската опрема наместо парцијални поправки.
Конгресот веќе има одобрено 12,5 милијарди долари за обнова на застарениот систем, но Белата куќа и ресорното министерство побараа дополнителни 30,1 милијарди долари, додека министерот Дафи смета дека вкупните вложувања треба да достигнат и до 50 милијарди долари.