Македонскиот министер ја истакна важноста на одговорноста и демократијата
Министерот за надворешни работи и надворешна трговија, Тимчо Муцунски, истакна дека ја поддржува операцијата на американските власти во која беа уапсени венецуелскиот претседател Николас Мадуро и неговата сопруга. Преку својот профил на социјалната мрежа Икс, Муцунски оцени дека апсењето е важен чекор за одговорност и соочување со правдата.
„Ја поздравувам објавата на Доналд Трамп дека Николас Мадуро е уапсен и ќе се соочи со правдата“, напиша Муцунски.
Тој исто така упати пофални зборови до државниот секретар Марко Рубио за неговото лидерство во справувањето со нарко-криминалните мрежи на режимот на Мадуро.
„Одговорноста е важна. Ние стоиме зад Соединетите Американски Држави и венецуелскиот народ за слобода и демократија“, додаде Муцунски.
I welcome @POTUS Donald Trump’s announcement that Nicolás Maduro has been arrested and will face justice.
I also commend @SecRubio for his leadership in confronting the Maduro regime’s narco-criminal networks.
Accountability matters. We stand with the 🇺🇸 United States and the…
— Timco Mucunski (@TimcoMucunski) January 3, 2026
Трамп и американските власти со детали за операцијата
Претходно, Доналд Трамп на социјалната мрежа Трут Соушл соопшти дека Соединетите Американски Држави извршиле голем воздушен напад врз Венецуела, во рамки на кој биле заробени претседателот Николас Мадуро и неговата сопруга.
„Венецуелскиот лидер Мадуро е заробен и изнесен од земјата“, напиша Трамп.
Главната обвинителка на САД, Пам Бонди, објави дека Мадуро и неговата сопруга, Силија Флорес, се обвинети за повеќе кривични дела поврзани со дрога и оружје. Таа на Икс истакна дека
„Мадуро наскоро ќе се соочи со целиот гнев на американската правда на американска почва, во американските судови“.