МВР: Дојавите за поставени бомби во училиштата се лажни

Лажни дојави се заканите што денеска по електронска пошта ги добиле четири училишта во Скопје за наводно поставени експлозивни направи. Тоа е утврдено откако се направени сите потребни проверки, информира попладнево Министерството за внатрешни работи.

-Веднаш по добиените пријави, од полициски службеници се преземени мерки за безбедно евакуирање на училиштата, а потоа се извршени и детални проверки од тимови за антитерористички проверки и утврдено е дека станува збор за лажни пријави, наведува МВР во известувањето.

Во СВР Скопје денеска околу 14 часот е пријавено дека на мејловите на четири средни училишта во Скопје е упатена закана за поставена бомба. Станува збор за училиштата „Орце Николов“, „Никола Карев“, „Здравко Цветковски“ и „Јосип Броз Тито“, потврдија за МИА од МВР.

МВР завчера доби пријави од девет училишта на територија на главниот град дека на нивните електронски адреси добиле порака со закана за поставена бомби, а по завршените антитерористички проверки беше утврдено дека станува збор за лажни пријави.

Девет училишта и минатата недела неколку дена по ред на нивните електронските адреси добиваа дојави за бомби, кои по проверката од страна на МВР се потврди дека се лажни.