Додека Скопје се подготвува за засилен сообраќаен метеж во пресрет на празниците, системот „Сејф сити“ од утре, 1 декември, ќе добие нова улога: автоматско регистрирање на сообраќајни прекршоци. Министерството за внатрешни работи го активира проектот „Безбеден град, безбедна држава“, кој до Нова Година ќе работи во пробен период, а од 1 јануари ќе почнат да пристигнуваат и првите казни од функционирањето на „Сејф сити“.
Според портпаролот на МВР, Гоце Андреевски, секој прекршок што ќе го евидентира електронскиот систем ќе биде санкциониран согласно прописите за максимална дозволена брзина на движење. Тој посочува дека нема да има толеранција, независно дали прекршокот е направен во населено место или надвор од него.
Сопствениците на возила чии прекршоци ќе бидат документирани ќе добиваат СМС и е-мејл известување со линк за преземање на записникот и платниот налог. Од моментот на приемот започнува рок од осум дена во кој казната може да се плати во половичен износ. По истекот на тој период следуваат уште осум дена за целосно плаќање, пред да започне постапката за присилна наплата.
Казните ќе може да се плаќаат и електронски, при што системот веднаш ќе го извести МВР дека глобата е подмирена. Од Министерството појаснуваат дека санкционирањето е во согласност со Законот за безбедност на сообраќајот на патиштата, кој со последните измени дозволува прекршоците да се документираат со камери, без толеранција и на сите локации каде што се врши снимање – и во град и на автопат.
Во првата фаза системот ќе бележи прекршоци како управување со брзина поголема од дозволената, минување на црвено светло, истечен рок на сообраќајната дозвола и непрописно паркирање. Во наредната фаза е планирано проширување на видот на прекршоците што ќе ги регистрира електронскиот систем, најави Андреевски.