Во текот на натамошниот процес на проширување, Европската унија мора да биде подготвена за тоа дека правилата што важат за нејзините 27 членки нема да функционираат за 30, па дури и за 35 земји, рече претседателката на Европскиот парламент, Роберта Мецола, во Берлин на конференција „Состојбата во Европа 2023“ спонзорирана од фондацијата Конрад Аденауер.
-Историјата ни покажува дека проширувањето на Европската унија, засновано на јасни заеднички цели, претставува инвестиција во мирот, безбедноста и напредокот на европскиот континент. Тоа е процес што е од корист за сите вклучени страни. Затоа Европскиот парламент минатата година повика Украина и Молдавија да добијат кандидатски статус, посочи таа и додаде дека тоа им дава јасна европска перспектива на овие земји и служи како силен поттик за развој и реформи, пренесува Укринформ.
Мецола истакна дека самата Европска унија мора внимателно да се подготви за такво проширување и да ги спроведе неопходните реформи за да се спречат нови одложувања и разочарувања во земјите кандидати.
-Мораме да бидеме подготвени и да разбереме: тоа што функционира за Европската унија од 27 земји нема да функционира во Европската унија од 30, 33 или 35 членки. И кога тоа ќе се случи, не треба да очајуваме. Затоа што за сите овие земји, ветената перспектива на Европа е тоа што ги движи луѓето. Владите растат и паѓаат врз основа на тоа како ги одржуваме нашите обврски и ветувања, нагласи Мецола.
Како што потсетува украинската агенција, за време на говорот во Европскиот парламент, претседателката на Европската комисија, Урсула фон дер Лајен, истакна дека во сегашните геополитички околности, процесот на проширување ќе ги задоволи интересите на целата ЕУ и ќе придонесе за ширење на стабилност, безбедност и просперитет низ цела Европа.
Истовремено, како што наведе таа, ЕУ мора да се подготви за влез на нови земји за да не ја изгуби ефективноста на своите институции и да ја задржи способноста за донесување ефективни одлуки