НАБАВКА НА СОФТВЕР ЗА ШПИОНАЖА: МВР ги отфрла обвинувањата на СДСМ – се работи за обновување лиценци за форензички софтвер кој се користи веќе 10 години

МВР: Обновени се лиценци за дигитална форензика, не за прислушкување

Министерството за внатрешни работи категорично ги отфрли како неосновани и неточни тврдењата на СДСМ за наводна набавка на софтвер за шпионажа. Во официјално соопштение, МВР појасни дека станува збор за редовно обновување на лиценци за специјализиран форензички софтвер, кој веќе повеќе од една деценија се користи за анализа на дигитални податоци во кривични истраги.

Според МВР, овој софтвер не овозможува и не се користи за прислушкување, туку е стандардна алатка за дигитална форензика, каква што се употребува и во безбедносни институции низ целиот свет.

Ист софтвер набавен и во 2021 година од министер од СДСМ

Во соопштението се истакнува дека идентична набавка била направена и во 2021 година, во период кога Министерството било раководено од министер предложен од СДСМ, што според МВР ја прави противречна денешната изјава на таа партија.

„Набавката е извршена транспарентно и според Законот за јавни набавки, со единствена цел – зајакнување на капацитетите на Одделот за форензички испитувања и докажување на кривични дела,“ се наведува во документот.

МВР апелира против дезинформации и политички конструкции

Од Министерството повикуваат на воздржаност од пласирање дезинформации, бидејќи тоа ја нарушува довербата на граѓаните во институциите. Според нив, борбата против криминалот мора да биде заеднички приоритет, а не основа за политички конструкции.

„Очекуваме поддршка за професионалното и законито постапување на службите во интерес на јавната безбедност. Само оние кои се плашат од функционални институции и владеење на правото имаат корист од ширење на дезинформации,“ се наведува во завршниот дел од соопштението.

СДСМ: МВР набавува софтвер за шпионажа и прислушкување

Политичката партија СДСМ денеска објави дека Министерството за внатрешни работи на почетокот на мај склучило договор за набавка на софтвер кој се користи за прислушкување и шпионажа на телефонски уреди. Според нив, ова претставува злоупотреба на институциите и опасност за приватноста на граѓаните.