Најмалку тројца морнари загинаа во експлозија во брод на индиската морнарица, соопштија денеска претставници на индиското Министерство за одрана, пренесе ДПА.
-Експлозијата се случила вчеравечер на бродот „ИНС Ранвир“, на пристаништето во Мумбај и во моментов се истражуваат причините за инцидентот, изјави портпаролот на морнарицата.
Портпаролот додаде дека екипажот на бродот веднаш реагирал за да ја стави ситуацијата под контрола и не била регистрирана поголема материјална штета.
Владини извори за индиските медиуми изјавија дека експлозијата, што се случила во внатрешен оддел на бродот, немала никаква врска со оружје или муниција.
„ИНС Ранвир“ е меѓу најстарите воени бродови на индиската морнарица, јавија домашните медиуми. Бил изграден во поранешниот Советски Сојуз и пуштен во употреба во индиската морнарица во април 1986 година.
Командантот на индиската морнарица, адмирал Р Хари Кумар, им изрази сочувство на семејствата на морнарите кои загинаа во инцидентот.