Нема изгледи за средба меѓу Владимир Путин и Володимир Зеленски во скоро време, порача германскиот канцелар Фридрих Мерц, ставајќи точка на очекувањата што ги подгреа Доналд Трамп по телефонскиот разговор со рускиот претседател минатата недела.
Мерц ја даде оваа изјава по средбата со францускиот претседател Емануел Макрон во летната резиденција Форт де Брегансон, каде разговараа за дипломатските напори за ставање крај на војната во Украина. „Очигледно нема да има средба меѓу претседателот Зеленски и претседателот Путин“, рече германскиот канцелар, потсетувајќи дека ситуацијата е различна од она што било кажано во Вашингтон.
Трамп минатата недела тврдеше дека Путин се согласил да седне со Зеленски, но Москва подоцна прецизираше дека станува збор само за можност за обнова на претходните билатерални мировни разговори на повисоко ниво.
Обвинувањата за застојот повторно беа насочени кон Кремљ. Германскиот министер за надворешни работи Јохан Вадефул во Загреб изјави дека Путин „само купува време“. „Ако мисли дека може да купи време, тогаш погрешно пресметува, бидејќи нашата поддршка нема да се намали“, порача Вадефул по средбата со својот хрватски колега.