„Последиците од штетните договори допрва ќе се чувствуваат. Иначе едно е пропагандата, а друго е вистината. Пропагандата трае одреден временски период, и после тоа доаѓа вистината. Во однос на јазикот, јас и во разговори со вас пред четири години кога го анализиравме Преспанскиот договор една од работите на која што најмногу забележував беше третирањето на македонскиот народ и македонскиот јазик согласно овој т.н. Преспански договор. Таму членот 7 е јасен, и за жал е на линија на она што го зборуваат сега грчките власти. Имено таму се дефинира македонскиот јазик ограничен само на територијата на денешна Република Македонија, и се забранува да се користи терминот македонски јазик било каде надвор од територијата на Македонија“, истакна Александар Николоски, потпретседател на ВМРО-ДПМНЕ во гостување во емисијата „Што не е јасно“ на Алфа телевизија.

Николоски додаде дека дури и не се остава можност според членот 7 од Преспански договор дека некој надвор од територијата на Република Македонија може да зборува македонски јазик. И тоа е спротивно на пропагандата на власта.

„Но, ова што сега се случува во Грција е потврда на ова што јас го кажувам и тоа што го пишува во Преспаснкиот договор. И тоа е по мене едно од најголемите проблеми дури и зло би рекол кое што го има во тој договор, за ваквото ограничување на термините македонски народ и македонски јазик“, рече потпретседателот на ВМРО-ДПМНЕ.

Тој посочи дека него најмногу загрижува што Владата на СДСМ и на ДУИ ги потпиша штетните договори за Македонија и даде право и легитимитет на Владите на Бугарија и Грција да се повикуваат на документи.