Анализите на мострите од водата земени од ОУ „Димо Хаџи Димов“ се целосно завршени и покажуваат дека физичко-хемиските и микробиолошките параметри се во рамките на референтните вредности, а тешки метали не се пронајдени, соопшти денеска Институтот за јавно здравје (ИЈЗ).
Од Институтот потсетуваат дека претходно, при анализата на мостри од храната и работните површини, биле детектирани фекални бактерии enterobacteriaceae во мусаката, како и на повеќе површини во кујната и училиштето, што укажува на сериозни пропусти во хигиената. Од седумте примероци на биолошки материјал доставени од деца со симптоми, шест се позитивни на норовирус.
ИЈЗ информира дека дежурните екипи работат и за време на викендот и ги обработуваат сите добиени мостри, вклучително и биолошки материјали доставени изминатите денови од училиштата, со цел навремено справување со ситуацијата. За дополнителните примероци пристигнати од другите девет училишта во општина Карпош, ИЈЗ ќе соопшти резултати во понеделник.
Институтот наведува дека е во постојана комуникација со сите надлежни институции и дека јавноста ќе биде редовно информирана.
Норовирусот, познат и како „зимски стомачен вирус“, предизвикува акутен гастроентеритис со изненадно повраќање и воденаста дијареја. Досега вкупно 13 деца побарале медицинска помош.
Случајот започна пред три дена, кога повеќе ученици од „Димо Хаџи Димов“ од Влае се пожалија на стомачни тегоби. Институциите веднаш се посомневаа на труење со храна, ја затворија училишната кујна и ги испитаа мострите од храната, вработените и површините во училиштето.