Министерството за внатрешни работи соопшти дека продолжува со дигитализацијата на процесите и услугите за граѓаните, со цел побрза и поефикасна услуга, како и заштеда на времето при користење на услугите на институцијата. Во таа насока, Секторот за информатичка технологија при МВР изработи ново веб-решение за автоматска размена на податоци за изгубени или украдени документи што треба да бидат објавени во „Службен весник“.
Со новиот систем се укинува досегашната пракса на испраќање податоци по електронска пошта. Врз основа на потпишаниот договор меѓу МВР и „Службен весник“, размената ќе се врши преку националната платформа за интероперабилност.
Според објаснувањето од МВР, со новиот унапреден начин на работа, „Службен весник“ на дневно ниво автоматски ќе ги презема сите пријавени изгубени или украдени документи, со цел тие навремено да се објават како неважечки.
По нивното објавување, МВР на ист начин – преку националната платформа за интероперабилност – автоматски ќе ги презема објавените неважечки документи од страна на „Службен весник“ и ќе ги ажурира во својот интерен систем. Ова, велат од Министерството, ќе овозможи граѓаните побрзо да добијат нов документ.