Шпанската тениска легенда Рафаел Надал ќе му се приклучи на управниот одбор на Реал Мадрид доколку предлогот биде официјално одобрен од претставниците на членовите на клубот. Освојувачот на 22 Гренд слем титули со ова ќе го направи својот прв значаен чекор кон преземање официјална раководна улога во шпанскиот фудбалски гигант, со кој веќе со години одржува исклучително блиски релации.
Надал долго време се споменуваше во комбинации за раководна функција во тимот од „Сантијаго Бернабеу“, а низ годините редовно се шпекулираше и за негова потенцијална кандидатура за иден претседател на клубот. Познатиот шпански спортист е долгогодишен страстен поддржувач на „кралевите“, редовно ги следи натпреварите во живо од трибините и има одлична соработка со актуелниот претседател Флорентино Перез. Како потврда за неговата посветеност, во 2012 година тој ја доби и престижната титула почесен член на клубот.
Иако поранешниот светски рекет број еден претходно јавно изјавуваше дека нема амбиции активно да учествува во управувањето со клубот, сега е целосно подготвен да ја преземе оваа одговорност и да му помогне на тимот.
Во официјалното соопштение од Реал Мадрид го дефинираат Надал како една од најголемите легенди во историјата на спортот и еден од најпочитуваните и најпрепознатливите шпански спортисти на светско ниво.