Соединетите Американски Држави би можеле уште овој викенд да започнат нови воени напади врз Иран, објави CNN, повикувајќи се на двајца американски функционери запознаени со плановите. Иако конечната одлука сè уште не е донесена, а деталите за обемот на операцијата и целите не се целосно дефинирани, официјалните лица посочуваат дека подготовките се во тек и дека плановите можат да бидат изменети или откажани во последен момент.
Американскиот претседател Доналд Трамп, говорејќи на состанок на кабинетот во петокот, изрази незадоволство од досегашниот тек на дипломатските напори и најави можност за нова воена акција против Иран.
„Ќе ги удриме многу силно. Во одреден момент ќе речат: „Едноставно не можеме повеќе да издржиме“, изјави Трамп.
Според информациите на CNN, Централната команда на американската војска (CENTCOM) веќе изготвила повеќе оперативни сценарија, меѓу кои и план за интензивно двонеделно бомбардирање на иранските ракетни позиции.
Во рамки на подготовките се разгледуваат и можни напади врз нуклеарната инфраструктура на Иран. Една од потенцијалните цели е силно утврдениот подземен објект „Планината Пикејкс“, кој се наоѓа јужно од Техеран.
Американските претставници наведуваат дека се анализира и можноста за напади врз ирански енергетски капацитети, но администрацијата во Вашингтон засега пристапува претпазливо кон таквата опција. Главната причина е стравувањето дека Иран би можел да возврати со напади врз инфраструктурата во регионот на Персискиот Залив, што би можело дополнително да ги наруши светските енергетски пазари.
Овој став се разликува од позицијата на Израел. Израелскиот министер за одбрана Израел Кац претходно неделава изјави дека нападите врз иранската нафтена и енергетска инфраструктура би имале значително влијание врз економијата на Техеран.
„Навистина сакаме да ги нападнеме енергетските цели на Иран, но САД не го одобруваат тоа во моментов“, рече Кац.
Според достапните информации, засега нема индикации дека Израел директно ќе се приклучи на евентуалната нова американска воена операција.
По медиумските извештаи дека Трамп веќе дал наредба за нов бран напади, Белата куќа не сакаше да коментира оперативни детали, но порача дека САД нема да ги толерираат потезите на Техеран.
Од Белата куќа нагласија дека претседателот нема да „стои настрана“.
„Иран ќе продолжи да плаќа сè додека не седне на преговарачка маса на она што претседателот Трамп го смета за значаен начин“, изјави портпаролката на Белата куќа, Каролин Ливит.